पछिल्लो फिल्म ‘पिकु’मा रोमान्टिक अवतारमा देखिएका इरफान खान गत हप्तादेखि प्रदर्शनमा आएको नयाँ प्रेमकथा ‘करिब करिब सिंगल’ मार्फत प्रेमिल रुपमा प्रस्तुत भएका छन् । (नेपालमा भने प्रदर्शन हुन सकेन) । रोमान्टिक फिल्म खेल्न निकै मज्जा हुने इरफान बताउँछन् । बुलन्द मेथड अभिनयका ज्ञाता उनलाई आफ्नो अभिनयकारिता सबैभन्दा मनपर्ने कुरा हो । तनुजा चन्द्राको ‘करिब करिब सिंगल’मा उनको प्रेमिल प्रस्तुतिलाई दर्शक एवं समीक्षकहरुले निकै रुचाइरहेका छन् । यौनले कुण्ठित हाम्रो समाजमा फिल्मले लैंगिक आयामबारे बोल्ने उनी बताउँछन् । यो फिल्मसँगै उनले आफूलाई धेरै भन्दा धेरै प्रेमकथाका फिल्म गर्न मन लागेको बताउँछन् । यहाँ प्रस्तुत छ, उनै इरफानसँग एक भारतीय मिडियाले गरेको अन्तरंग कुराकानी :
फिल्ममा तपाईंलाई नदीको चिसो पानीमा र्याफ्टिङ गरेको देखिन्छ नि ?
मलाई र्याफ्टिङ गर्न निकै मज्जा लाग्छ । पानी मनपर्ने मलाई यस्तै साहसिक कामहरु गर्ने रुचिसमेत छ । र्याफ्टिङ गर्ने बेला तीनपटकसम्म पानीमा डुब्दा निकै मज्जा आयो । मैले राजस्थान, गाङतोक, दिल्ली र बनारसमा र्याफ्टिङ गरिसकेको छु । म अब स्काई डाइभिङ र संगीत सिक्न चाहन्छु । म जंगली बिराला, हात्ती र बाघ लगायतका सम्पूर्ण जंगली जनावरहरुलाई आफूसँगै राख्न चाहन्छु । हाम्रोमा यसरी जनावर राख्न पाइँदैन । म आफूलाई पनि जंगली जनावरजस्तै ठान्छु । सायद अब विदेशमा एउटा घर किनेर जनावर राख्छु होला ।
‘करिब करिब सिंगल’मा पार्थवीसँग काम गर्दाको अनुभव कस्तो रह्यो ?
पार्थवीसँग मेरो केमेस्ट्री राम्रै रह्यो । दक्षिण भारतीय फिल्ममा रमाइरहेकी उनको आगमनले हाम्रो फिल्ममा थप रङ थप्ने काम गर्यो । प्रायः कलाकारझैं उनी निकै जुझारु र नयाँ काम सिक्न चाहने स्वभावकी रहिछन् । मैलै पनि उनलाई धेरै प्रश्न सोधेर हैरान पार्थें ।
तपाईंका लागि प्रेम के हो ? मानिसहरु प्रेमका लागि मर्न तयार छु भन्छन् नि ?
हामीले प्रेम शब्द नै दुरुपयोग गर्दै आइरहेका छौं । प्रेम भन्ने चिज हामीले जीवनभर सिकिरहन्छौं । प्रेमको परिभाषा अहिलेसम्म कसैले बुझेको छैन । कतिपयले केही पाउनका लागि प्रेमलाई हतियारका रुपमा प्रयोग गर्दै आइरहेका छन् । जब म किशोर थिएँ त्यस समय बेरोजगार पनि थिएँ । सोही समयमा आफूले भेटेजतिका सुन्दर केटीहरुको प्रेममा पर्छु कि जस्तो लाग्थ्यो । अहिले मलाई प्रेममा कुनै रुचि नै छैन । म अहिले मेरो कामलाई प्रेम गर्दै आइरहेको छु ।
प्रेम वियोगलाई कसरी लिनुहुन्छ ?
कुनै समय म प्रेममा परेको थिएँ । म प्रेमबारेकै सपना देख्थेँ । केही समयमै मेरो प्रेम वियोगमा परिणत हुन्थ्यो । वियोगका बेला म चिच्चाउँछु, कविता र उदास गीतहरु लेख्छु ।
महिला निर्देशक तनुजा चन्द्रासँग काम गर्दाको अनुभवबारे बताउनुहोस् न ?
महिला निर्देशकहरुसँग काम गर्दा छुट्टै किसिमको अनुभव हुन्छ । उनीहरु एकैपटकमा धेरैभन्दा धेरै काम गर्न सक्छन् । उनीहरु कम्तिमा पनि पाँच वटा काम एकैपटक हेर्न र गर्न सक्छन् । पुरुषहरु यस्तो गर्न सक्दै सक्दैनन् । म पनि यदि कुनै काम गर्न थालेँ भने एकमात्र काममा तल्लिन हुन्छु । केहीअघि एक अन्तर्वार्तामा पार्थवीलाई हेरेको थिएँ । उनी अन्तर्वार्ताका क्रममा फ्ल्यासलाई समेत ध्यान दिएर हेरिरहेको मैले देखेँ । यसको मतलब महिलाहरु सानामसिना कुराहरुलाई कसरी ख्याल गर्छन् भन्ने हो । महिलाहरुसँग प्रतिवाद गर्न सकिन्न पनि । महिलाहरुले तपाईंलाई सुन्लान् तर उनीहरुले आफूले चाहेको मात्रै गर्छन् ।
दोस्रो प्रेमकथामा काम गर्दा कस्तो लाग्यो ?
मलाई निकै पहिलेदेखि प्रेमिल कथामा काम गर्न मन थियो । लामो समयदेखि म प्रेममा पर्न पाएको थिइनँ । प्रेममा पर्ने मेरो चाहनालाई फिल्मले बाटो खुलाई दियो ।
बलिउडमा गतिला फिल्म लेखकको अभाव भएकै हो त ?
हाम्रोमा गतिला लेखक छँदै छैनन् । अर्को कुरा गतिला लेखकलाई राम्रो पैसा दिने परम्परा छैन । हलिउडमा फिल्म लेखकलाई निकै महत्वका साथ हेरिन्छ । सम्भावना बोकेका नयाँ नयाँ राम्रा लेखकहरु पनि आइरहेका छन् । उनीहरुमा केही गर्छु भन्ने चाह छ ।
अभिनेता भइसकेपछि तपाईंमा लगाम लगाइएकोबारे विश्वास गर्नुहुन्छ ?
म यसबारे जतिसुकै सजग भए पनि म आफूलाई त्यस्तो ठान्दिनँ । म अभिनेता बन्छु भनेर यहाँ आएको पनि थिइनँ । मसँग कत्तिको क्षमता छ वा मैले मेरो क्षमता अनुसारको काम गर्न सकेको नहुन पनि सक्छु ।
तपाईंले फिल्म कसरी छान्नुहुन्छ ? केही सूत्र छन् कि ?
केही सूत्र नै छैनन् । मलाई कुनै विचार मनप¥यो भने त्यो फिल्म गरिहाल्छु । फिल्म छान्नु अनौपचारिक एवं स्वाभाविक प्रक्रिया हो । पहिला पहिला म फिल्ममा देखिन्छु भनेर मात्र गर्थेँ । म अब मेरो फिल्मी स्थान वा पैसाका लागि फिल्म गर्दिनँ । फिल्मको कथाले छोयो भने म अवश्य गर्छु ।
पछिल्लो युवापुस्ताका कलाकारबारे तपाईंको विचार ?
अहिलेका युवा कलाकार निकै स्मार्ट छन् । उनीहरु राम्रो एक्सपोजर चाहन्छन् पनि । केही कुरा सिक्नुपर्दा उनीहरु हामीभन्दा अगाडि छन् । युवा लेखक, निर्देशकहरु आएर हाम्रो सिनेमाको स्तरलाई अग्रस्थानमा पुर्याउँछन् जस्तो लाग्छ ।
तपाईंको काममा पत्नी सुतपाको कस्तो भूमिका छ ?
मेरो काममा उनले निकै सहयोग गर्छिन् । उनीसँग नाटक र अभिनयको ज्ञान मेरोभन्दा धेरै छ । आफूभन्दा पनि निकै तेज पत्नीबाट केही कुराहरु सिक्न पाउँदा आनन्द महसुस हुन्छ ।
तपाईंले आफ्नो काम वा जीवनलाई कसरी चलाउने भनेर योजना बनाउनुहुन्छ ?
अहिलेसम्म मेरो जीवन मज्जाले चलेको छ । पछिल्लो समय मैले योजना बनाउन छाडेको छु । योजना बनाएर काम गर्दा वा कसैको सल्लाह लिएर गरेका कुनै पनि सफल भएका छैनन् मेरा । योजना बेगर गरेका कामहरु नै सफल भएका छन् ।
आत्मकथा लेख्नेबारे केही योजना बनाउनुभएको छ ?
मलाई कसैले लेख है भनेका थिए । मैले यसबारे केही भनिनँ । मेरो व्यक्तिगत कथा अरुलाई सुनाउँदा निकै बोरिङ हुन्छ । कसैले मेरा बारेमा रमाइलो किसिमको कथा लेख्छ भने त्यसबारे पक्कै सोचौला तर अहिलेको मेरो फोकस भनेकै अभिनय हो ।
अबका कामबारे बताइदिनुहोस् न ?
म छिट्टै ‘मिनिस्ट्री’ नामको वेभ सिरिज गर्दैछु । यसमा निकै रमाइलो कन्सेप्ट छ । म के गर्ने भनेर सोच्दैछु । अभिनव देवको फिल्म सकिसकेको छु । आगमी वर्षको फेब्रुअरीमा त्यो प्रदर्शनमा आउनेछ । विशाल भारद्वाजको नयाँ फिल्मबारे म निकै हौसिएको छु । ‘पिकु’ पछि मलाई दीपिकासँग काम गर्न मन लागेको छ । फाइनल स्क्रिप्ट कुरेर बसेको छु । त्यस्तै सुजित सरकार र अनुराग बसुसँग फेरि काम गर्ने इच्छा छ । मलायलम अभिनेता दलक्वीर सलमान, मिथिला पल्कार र अम्लासँग रोनी स्क्रूवालाको फिल्म गर्दैछु ।
आगामी वर्ष केली म्याकडोनाल्डसँग तपाईंको हलिउड फिल्म ‘पजल’ आउँदै छ नि ?
फिल्मले एक महिलाको कथा भन्छ । प्रतिभाशाली केलीसँगै काम गर्न पाउँदा निकै खुसी लाग्यो । उनीसँग काम गर्न पाउँदा कलाकारिताका विभिन्न पाटाबारे जानकार हुने मौका पाएँ ।
‘हिन्दी मिडियम’ले बक्स अफिसमा एकदमै राम्रो ग¥यो । यसको सिक्वेल आउने कुरा छ नि ?
सिक्वेलमा काम गर्न पाएमा म निकै खुसी हुनेछु तर मेरो एकमात्र सर्त भनेकै पैसा कमाउने ध्येयले फिल्मको नाम बिकाउनु हुँदैन । पहिलेको भन्दा राम्रो र भिन्दै तर उस्तै प्रभावशाली कथा भयो भने म त्यसमा काम गर्न तयार हुनेछु ।