एजेन्सी, पोर्चुगलका स्टार क्रिस्टियानो रोनाल्डोले मंगलबार लगातार दोस्रो पटक विश्व वर्ष खेलाडी बन्ने क्रममा पाँच पटक बालन डी’अर जित्ने अर्जेन्टिनी खेलाडी लियोनल मेसीको कीर्तिमानसँग बराबरी गरेका छन् ।
रियाल मड्रिडका फरवार्ड रोनाल्डोले बार्सिलोनाका मेसी र सबैभन्दा महंगा खेलाडी नेइमारलाई पछि पार्दै बालन डी’अर उपाधि जितेका हुन् । ३२ वर्षे रोनाल्डोले गत सिजन रियालबाट च्याम्पियन्स लिगको उपाधि रक्षा गर्ने क्रममा प्रतियोगिताकै सर्बाधिक गोलकर्ता बनेका थिए । त्यसका साथै पछिल्लो पाँच वर्षमा रियाललाई पहिलो पटक स्पेनिस ला लिगाको उपािध जिताउन पनि रोनाल्डोले योगदान गरेका थिए ।
‘पक्कै पनि, म धेरै खुशी छु । हरेक वर्ष मैले जित्न चाहने अवार्ड हो यो,’ पेरिसस्थित आइफल टावरमा अवार्ड जितेपछि रोनाल्डोले भने, ‘गत वर्ष जितेका उपाधिहरुले यो अवार्ड जित्न सहज भयो । रियाल मड्रिडका साथीहरु र मलाई यहाँसम्म पु¥याउन सहयोग गुर्नहुने सबैलाई धन्यवाद भन्न चाहन्छु ।’
रोनाल्डोले दुई महिनाअघि फिफा वर्ष खेलाडीको अवार्ड पनि जितेका थिए । यसअघि २००८, २०१३, २०१४ र २०१६ मा बालन डी’अर अवार्ड जितेका रोनाल्डोले गत वर्ष रियाल मड्रिडबाट ४२ गोल गर्नुका साथै पोर्चुगललाई विश्वकपमा छनोट गराउने क्रममा १५ गोल गरेका थिए । युरोपियन च्याम्पियनसिपमा आयोजक फ्रान्सलाई हराउँदै उपाधि जित्दा पोर्चुगलको नेतृत्व गरेका रोनाल्डोले रुसमा हुने विश्वकपमा राष्ट्रिय टोलीको नेतृत्व सम्हाल्ने छन् ।
२००७÷०८ मा म्यानचेस्टर युनाइटेडलाई च्याम्पियन्स लिगको उपाधि जिताएपछि पहिलो पटक बालन डी’अर को उपाधि जितेका रोनाल्डो र मेसीले पछिल्लो एक दशक पालौपालो यो अवार्ड जितेका छन् ।
‘अझै केही वर्ष यो स्तरमा खेल्न सक्ने विश्वास छ । आशा गरौं, मेसीसँगको प्रतिस्पर्धा कायम रहनेछ,’ रोनाल्डोले थपे, ‘यो सिजन राम्रै महशुस गरेको छु । हेरौं वर्षको अन्त्यसम्म हामी के जित्न सक्छौं ।’
बेर्नाबेउमै करियर अन्त्य गर्ने बारे रोनाल्डोले थपे, ‘मड्रिडमा म खुशी छु । सम्भव भएसम्म म यही रहन चाहन्छु ।’
फिफासँगको सहकार्य टुटेपछि फ्रान्स फुटबल म्यागजिनले एकल रुपमा बालन डी’अर अवार्ड प्रदान गरेको यो दोस्रो पटक हो । पहिलो पटक १९५६ मा इङ्ल्यान्डका स्टेनली म्याथ्युजले जितेका थिए । गत वर्ष पाँचौं स्थानमा रहेका ब्राजिलका फरवार्ड नेइमार यसपाली तेस्रो स्थानमा रहे । बार्सिलोनाबाट कीर्तिमानी रकममा पेरिस सेन्ट जर्मन (पिएसजी) गएका नेइमारले यो सिजन १५ गोल गरिसकेका छन् । नेइमारबारे रोनाल्डोले भने, ‘उनी ठूलो सम्भावना बोकेका प्रतिभावान खेलाडी हुन् । भविष्यमा उनले जित्ने सम्भावना बलियो छ ।’
युभेन्ट्सका भेट्रान गोलकिपर जियानलुइजी बुफोन चौथो स्थानमा रहँदा रियालकै लुका मोडरिच पाँचौं स्थानमा रहे ।