हेयर डिजाइन तथा मेकअप(ब्युटी) सम्बन्धी  कोर्स गर्न चाहनेहरुलाई खुसीको खबर छ, धरानमा सेवा मात्र होइन, युवाहरुलाई स्वरोजगार बनाउने उद्देश्यले कोर्ससमेत राखेर रेड कार्पेट युनिसेक्स सेलुन एकेडेमी सुरु भएको छ ।
धरान १०, पुतलीलाइनमा सोमबार एक कार्यक्रमबीचमा धरान उपमहानगरपालिकाकी उपप्रमुख मञ्जु भण्डारी सुुवेदी र नायिका अंशु थापाले संयुक्त रुपमा रिबन काटेर एकेडेमीको उद्घाटन गरेका थिए । यस एकेडेमीमा सौन्दर्यसम्बन्धी सम्पूर्ण सुविधाका साथै अध्ययन गर्न चाहनेहरुलाई विभिन्न कोर्सहरु पनि उपलब्ध भएको सञ्चालकहरुले जनाएका छन् । यो एकेडेमी १० वर्ष कोरिया बसेर फर्केका युवा समीर निरौलासँगै विवेक आले र मीनकुमार सारु मगरले संयुक्त लगानीमा सञ्चालनमा ल्याएका हुन् । हालसम्म ३५ लाख खर्च भइसकेको एकेडेमीमा ५० लाख खर्च हुने उनीहरुको अनुमान छ ।
उद्घाटन अवसरमा उपप्रमुख भण्डारी र नायिका थापाको हेयर एन मेकअप गरिएको थियो । मानिसलाई भित्री सुन्दरतासँगै बाहिरी सुन्दरताको पनि उत्तिकै आवश्यकता भएकाले सेलुन एकेडेमी सञ्चालनमा ल्याएको सञ्चालक आलेले बताए । आफू स्वरोजगार बनेर दक्ष जनशक्ति उत्पादन गरी युवाहरुलाई पनि आत्मनिर्भर बनाउने आफूहरुको चाहना भएको उनले बताए । ‘आफ्नै देशमा केही गरौं न त भनेर लगानी गरेका हौं, हामी स्वरोजगार बन्छांै र कोर्स गराएर अन्यलाई पनि आत्मनिर्भर हुने बाटोमा हिडाउँछौं,’ आलेले भने ।
एकेडेमीमा महिला, पुरुष र बालबालिकाहरुलाई एकै ठाउँमा सौन्दर्यसम्बन्धी सम्पूर्ण सुविधा उपलब्ध हुने सञ्चालकहरुले बताएका छन् । यस्तै, अत्याधुनिक तथा सुविधा सम्पन्न हल, नयाँ प्रविधिको प्रयोगबाट सेवा, ब्रान्डेड कम्पनीको मात्र सामान प्रयोग गरिने, ५ सयभन्दा बढी हेयर कट स्टाइल, कपालमा ब्लेड प्रयोग नगर्ने र सेलिब्रेटीहरुका लागि बेग्लै व्यवस्था भएको अर्का सञ्चालक सारु मगरले बताए । उनले भने, ‘हामीले हेयर स्ट्रेट, स्मोथिङ, हेयर कलर, स्पा, हेडर डिजाइन, ड्रेसिङ, फेसियल, डे मेकअप, पार्टी र वेडिङ मेकअप, नेल आर्ट, मेहन्दी, मेडिकेयर र पेडिकेयर पनि सेवा दिन्छौं ।’ प्रयोग गरिने औजारहरु र सरसफाईमा एकदमै ध्यान दिइएको उनले बताए ।
एकेडेमीमा २ महिना बेसिक हेयर कोर्स, ३ महिना बेसिक हेयर एन ब्युटी कोर्स, २ साताको मेकअप, नेल आर्ट र मेहन्दी कोर्स, ६ महिने एडभान्स तथ डिप्लोमा फुल कोर्ससँगै अब्रोर्ड स्पेसल २ महिने कोर्स पनि गराइने आलेले बताए । ‘कोर्स गरेका विद्यार्थीहरुलाई भविष्यमा हाम्रो शाखामा रोजगारी पाउँछन्, र स्वरोजगार पनि बन्छन् । विदेशमा पनि राम्रो तलबमा काम पाउन सक्छन्,’ उनले भने । एकेडेमीमा हाल हेयर एक्सपर्टको रुपमा रोशन ठाकुर छन् भने स्टेज साथै बेहुला–बेहुली मेकअप एक्सपर्टका रुपमा सुशील पौडेल छन् । दुई दशकदेखि मेकअप क्षेत्रमा रहेका पौडेलले भने चाँडै मेकअप स्टुडियो पनि सञ्चालन गर्ने बताए । उनले भने, ‘मेकअप स्टुडियो पनि चलाउँछौं, त्यहाँ क्लास हुन्छ र पर्सनालिटी झल्काउने गरी मेकअप गर्छौं ।’ एकेडेमीमा सेलिब्रिटीहरुलाई स्टेज पर्फमेन्स गराउन र बेहुला–बेहुलीलाई विशेष मेकअपको व्यवस्था भएको पनि उनले बताए ।