पोखरामा अन्तर्राष्ट्रिय कला शिविर तथा प्रदर्शनी भयो। सुनहरि छबिल फाउण्डेसन राजस्थान इन्डियाको आयोजनामा इन्डिया नेपाल अन्तर्राष्ट्रिय कला कार्यशाला तथा प्रदर्शनी पोखराको लेकसाइडमा भएको हो।

प्रदर्शनीमा २५ भारतीय र ११ नेपाली कलाकारले कोरेका तस्बिर प्रदर्शनी गरिएको थियो। दुई दिन भएको कार्यक्रममार्फत एक अर्काको कला आदान–प्रदानसमेत भएको थियो।

यसअघि भारतको सिमला, राजस्थान, दिल्लीलगायतका ठाउँमा कार्यक्रम गरिसकेको र पोखरामा आयोजित कार्यक्रम चौथो भएको फाउन्डेसनका संरक्षक अशोक अग्रवालले जानकारी दिए। ७ वर्षअघि खुलेको फाउन्डेसनले आर्थिक अवस्था कमजोर भएका र अवसर नपाएका कलाकारलाई सहयोग गर्दै देश विदेश डुलाइरहेको अग्रवालले बताए।