‘ऐश्वर्य’ फिल्मबाट अभिनय यात्रा थालेकी अभिनेत्री दीपिका प्रसाईंको अभिनयलाई ‘छक्का पञ्जा ३’मा पनि देख्न पाइएको थियो। उनैसँग गरिएको जाडो कुराकानीः

तपाईंलाई जाडो मौसम कस्तो लाग्छ ?
मलाई जाडो मन पर्दैन।

रत्ति मन पर्दैन त ?
जाडोको मनपर्ने पक्ष नै छैन। खाली अल्छी मात्रै लाग्छ। 

खासमा जाडो मन नपर्ने किन त ?
धेरै छन्। पहिलो कुरा त जाडोमा चिसो लागिहाल्छ। मेरो शरीरले चिसो सहनै सक्दैन। अनि फेरि यो समयमा अलिक बढी अल्छी लाग्छ। बिहान उठ्नै मन लाग्दैन।

जाडोमा सुटिङ परेको छ कि छैन ?
परेको छ नि ! मेरो पहिलो फिल्म ‘ऐश्वर्य’को सुटिङ जाडोकै बेला थियो। मंसिर महिनाको अन्तिमतिर थियो। स्विमिङ पुलमा स्विमिङ गर्नु परेको थियो। दिनभरि जस्तो नै त्यो सिन गर्नुप-यो। जतिबेला पनि भिजिरहनुपर्ने भएकाले मलाई साह्रै गाह्रो भा’को थियो। 

जाडोमा कस्ता पहिरन मनपर्छ ?
लामो लुगा नै मनपर्छ। शरीर ढाक्ने र न्यायो पनि होस्। देखाउन भन्दा पनि जाडो छल्न।

जाडो मौसममा घुम्न कत्तिको मन लाग्छ ?
सानोमा त धेरै नै पिकनिक गइन्थ्यो। गाउँमा साथीहरु भेला भएर पिकनिक जाने सल्लाह हुन्थ्यो। अहिले त पहिलाको जस्तो पिकनिक जाने भन्ने छैन तर परिवारसँग मिलेर चाहिँ गइएको छ। जाडोमा भन्दा मलाई गर्मीमा नै ट्राभल गर्न मन लाग्छ।