पाँच वर्षअघि भारतीय च्यानल जीटीभीबाट प्रसारण हुने ‘डान्स इन्डिया डान्स’को तेस्रो सिजनको उपाधि जितेकी नेपाली कलाकार तेरिया मगरले शनिवार ‘झलक दिखला जा’को नवौँ संस्करणको उपाधि चुमेकी छिन् । कलर्स च्यानलबाट प्रसारण हुने सोकी विजेता उनले उपाधिसँगै ३० लाख भारतीय रुपैयाँ र रेनाल्ड डस्टर ब्रान्डको कार पाइन् ।
शनिवार प्रसारण भएको फाइनलमा तेरियाले अन्य दुई प्रतियोगी सलमान युसुफ खान र शान्तनु महेश्वरीसँग कडा प्रतिस्पर्धा गर्दै उपाधि सुरक्षित गरेकी हुन् ।
तेरिया रूपन्देही, रुद्रपुरकी हुन् । तेरियाका हजुरबुबा कृष्णबहादुरले केही दिनअघि काठमाडौँमा पत्रकार सम्मेलन गर्दै अनलाइन वा मोबाइल भोटिङमार्फत भोट दिएर आफ्नी नातिनीलाई जिताउन अपिल गरेका थिए । उनी तेरिया मगर फाउन्डेसन अध्यक्षसमेत हुन् ।