‘अरूको डेटिङ हेरेर बस्ने हो’
आशिष राना ‘लाहुरे’
र्यापर
प्रेमी–प्रेमिकाका लागि विशेष दिन भनिए पनि मेरा लागि भ्यालेन्टाइन डे भनेको अरू डेटिङ गएको हेरेर बस्ने दिन हो । अहिलेसम्म यो दिन मनाउन पाएको छैन । अहिलेसम्म लभ नपरेको भएर होला, यो दिन मेरा लागि विशेष नभएको । फ्यानहरूको माया पाए पनि आशिष राना भनेर कोही केटीबाट न त लभ लेटर आयो न प्रेम प्रस्ताव नै आए ।

डेटिङ जानुपर्छ भन्दा रातोपिरो हुन्थेँ
अदिती बुढाथोकी
नायिका
स्कुलमा पढ्दा लजालु स्वभावकी थिएँ । डेटिङका लागि प्रस्ताव आइरहेका हुन्थे । कसैले डेटिङ जानुपर्छ भन्दा रातोपिरो हुन्थेँ । यसको मतलब लभ नै परेन भन्न मिल्दैन । कहिले काहीँ साथी भेटेर रमाइलो गर्ने गथ्र्याैं । यसपटक फिल्मको दौडधूपले भ्यालेन्टाइन डेको कुनै योजना बनाएको छैन । भ्याउँदा पनि भ्याइँदैन । मनमा ड्रिम ब्वाई छ । ऊ देखावटी गर्नेभन्दा वास्तविक जीवन बुझ्ने होस् । मेरो विचारलाई सम्मान गर्ने खालको होस् । अहिलेसम्म भेट भएको छैन ।
मायाले रोमान्टिक बनाउँछ
तेन्जिङ छेतेन भुटिया,
फेसन डिजाइनर
अहिले म सिंगल छु । यसपटकको भ्यालेन्टाइन डेमा साथीहरू मिलेर रात्रि डिनरमा जाने योजना बनाइरहेको छु । भ्यालेन्टाइन डे प्रेमी–प्रेमिकाले मात्र मनाउनु पर्छ भन्ने होइन । गएका वर्षमा जब भ्यालेन्टाइन डे मनाउँदै हुन्थे, कसैले तपार्इंलाई माया गर्छ भन्ने कुराले रोमान्टिक बनाउँथ्यो । कुनै योजना नबनाए पनि त्यो दिन विशेष भइदिन्थ्यो । त्यसबेला म काठमाडौंमा पहिला कहिल्यै नपुगेका ठाँउमा पुगेको थिएँ । आशा गरौं फेरि त्यो दिनको सकारात्मक महसुस गर्न पाउनेछु ।
मलाई त सबै दिन प्रेम दिवस
हरिप्रभा खड्गी,
उपमेयर, काठमाडौं महानगरपालिका
३१ वर्ष पहिला लभ म्यारिज गरियो । त्यो बेला भ्यालेन्टाइन डेको चर्चा थिएन । अहिले जस्तो डेटिङ जाने चलन पनि थिएन । तर रेष्टुरेन्टतिर गएर चियागफ भने हुन्थ्यो ।
मलाई अहिले पनि भ्यालेन्टाइन डेको मतलब लाग्दैन । सायद जिम्मेवारी र उमेरले पनि होला । त्यसैले मैले भ्यालेन्टाइन डे मनाएको छैन । माया गर्नेका लागि एक दिन विशेष हुनुपर्छ भन्ने पनि लाग्दैन ।
संसार मायामा अडिएको छ । मायाले नै एकअर्काले बाँध्ने काम गर्छ । तर, प्रेम वाचा बन्धन भने होइन । प्रेम त विश्वास हो । त्यसैले त मायाको संसार विश्वासमा अडिएको भनिन्छ । विश्वास गर्न र माया दर्शाउन प्रेम दिवस एक दिन मात्र होइन ३ सय ६५ दिनै हुनुपर्छ । म त सधैँ प्रेम दिवस मनाउँछु । माया गर्ने दिन भन्दै मायालाई एक दिनमा खुम्चाउन चाहन्न ।