अभिनेता आर्यन सिग्देल र अभिनेत्री नम्रता श्रेष्ठलाई नेपाली फिल्मको हिट जोडी मानिन्छ । उनीहरू जोडी बनेर खेलेका अधिकांश फिल्म दर्शकले रुचाएका छन् । सुदर्शन थापा निर्देशकीय फिल्म ‘मेरो एउटा साथी छ’बाट उनीहरू पहिलो पल्ट प्रेम जोडीका रूपमा देखिएका थिए । फिल्म हिट पनि भयो । त्यसपछि दिनेश राउतको निर्देशनमा बनेका दुई फिल्म ‘नोभेम्बर रेन’ र ‘क्लासिक’मा पनि उनीहरूले सँगै काम गरे । दुवै फिल्म दर्शकले रुचाए । यतिबेला दिनेशले आर्यन र नम्रतालाई नै लिएर अर्को फिल्म निर्देशन गर्ने भएका छन् । प्री–प्रोडक्सनका क्रममा रहेको एक अनटाइटल फिल्मका लागि दिनेशले फेरि आर्यन र नम्रतालाई नै रोजेका हुन् । गोपीकृष्ण मुभिजको ब्यानरमा बनेको फिल्म ‘होमवर्क’मा पनि उनीहरूले सँगै काम गरेका थिए । तर, यो फिल्मले भने हलमा राम्रो व्यापार गर्न सकेन ।